Saturday, November 10, 2018

तमाची तमा बाळगू मी कशाला

तमाची तमा बाळगू मी कशाला 
इथे जागली स्पंदनाची धुनी 
तुझे नाव घेता विरे शीण सारा 
दिव्यांची जणू रोषणाई मनी 

तुझ्या आठवाने उटी चंदनाची 
जणू आसमंतात गंधाळते 
मिळे शांततेला नवा सूर आणि 
फुलें गर्द एकांत रानीवनी . 

: मिलिंद जोशी 

Thursday, October 25, 2018

मी

मीरेचे पैंजण 
त्यात मी घुंगरू 
कसें मी आवरू 
... मन माझें ?

नाथांची कावड 
तीत मी ओंजळ 
मला ये भोवळ 
... तहानेंची . 

जनाईचे जाते 
त्यातले मी पीठ 
झालो कसा धीट 
... भित्रा मी?

मुक्ताईचे डोळे 
त्यांत अश्रूबिंदू 
होऊनिया स्फुंदू 
... लागलो मी. 

ज्ञानियाची ओवीं 
तीतला मी छंद 
केली चिरेबंद 
... समाधी मी. 


: सदानंद शांताराम रेगे . 

Friday, August 10, 2018

आईच्या दुःखाचं

आईच्या दुःखाचं 
डोळाभर पाणी 
दाटली कहाणी 
आयुष्याची 

शेवटी मनींचे 
सांगणे राहिले 
हुंदक्यांनी मुके 
पंचप्राण 

गलबला सोसले 
सोडतांना घर 
माझे महाद्वार 
ओस झालें 

आमुच्या संसारी 
घोटाळों न मन 
तिथे तरी प्राण 
शांत राहों 

जात्याच्या ओवीचा 
संपला वेदांत 
देव्हाऱ्यात  वाट 
करपली. 

: पानझड 
: ना. धों . महानोर. 

Wednesday, August 8, 2018

उंच गेल्या डोंगरांच्या दोन रांगा

उंच गेल्या डोंगरांच्या दोन रांगा 
माखले शेवाळ हिरवे अंगअंगा 
पत्थरातुन निर्झरांचे शुभ्र पाणी 
वळणवाटांनी उतरते गात गाणी 

: पानझड 
: ना धों महानोर 

Thursday, April 12, 2018

कळ्यांचे दिवस, फुलांच्या राती

कळ्यांचे दिवस, फुलांच्या राती 
येती नि जाती येती नि जाती

नवल असे घडते काही 
स्वप्नात स्वप्न पडते बाई 
सख्याचा स्पर्श अनोखा हर्ष 
प्रितीच्या सारिका मंजुळ गाती

वाऱ्याची झुळूक बनतो झुला
क्षणात ऊंच नेतसे मला
सांजेचे रंग धुंद तरंग 
पाचही प्राण सुखात न्हाती

येते ती घटिका सुंदर आहे
आनंद हृदयी भरून वाहे
हिरवळ ओली पावलांखाली
नभीच्या चांदण्या खुडते हाती

- शांता शेळके

Tuesday, February 20, 2018

जीव गुंतला















कोवळ्या उन्हात जीव गुंतला
मोकळ्या क्षणात जीव गुंतला
सुख आले भरभरून, गेलेही
राहिल्या खुणांत जीव गुंतला
बोलले न प्रेम, फक्त सोसले
त्या खुळ्या मनात जीव गुंतला
दीप लाविला उरी कधी कुणी
आजही ॠणात जीव गुंतला
कळे निरोप घ्यायचा, नि घेतला
तरिही जीवनात जीव गुंतला
अरुणा ढेरे

Sunday, February 11, 2018

तळ्यांत

कसा कुणी एकाएकी 
खडा फेकला तळ्यांत ;
उमटल्या वलयांनी 
वेडा केला उभा काठ . 

झाली उलटीसुलटी 
तळ्यातली क्षणात ;
चुरा कोरीव लेण्याचा 
विरे काठाच्या मातींत . 

ओसरता एक क्षण 
पुन्हा सारे थिरावेल 
आणि सावध काठाशी 
लाट उगा उमळेल . 

: तळ्यांत 
: मेंदी 
: इंदिरा संत 


Saturday, February 3, 2018

पाप इमानी

कधीच वठला आहे नूर 
देठ फुलांचा दुःखे उगाच ;
कधीच झडली  परे पारवी 
उगाच खुपते आहे चोच ;
कधीच झुकला आहे सूर 
उगाच चढते तार गळ्याशी ;
कधीच हुकला आहे नेम 
उगा रुते हा तीर उराशी ;
कधीच ओसरलेला पूर 
उगाच वाळूंत शिंप हिमानी ;
जपते ..... जपते केव्हापासून 
तांबूस लाडिक पाप इमानी. 

: पाप इमानी 
: जोगवा 
: आरती प्रभू 

Thursday, January 18, 2018

चाँद तन्हा है आसमाँ तन्हा

चाँद तन्हा है आसमाँ तन्हा,
दिल मिला है कहाँ-कहाँ तन्हा
बुझ गई आस, छुप गया तारा,
थरथराता रहा धुआँ तन्हा
ज़िन्दगी क्या इसी को कहते हैं,
जिस्म तन्हा है और जाँ तन्हा
हमसफ़र कोई गर मिले भी कभी,
दोनों चलते रहें कहाँ तन्हा
जलती-बुझती-सी रोशनी के परे,
सिमटा-सिमटा-सा एक मकाँ तन्हा
राह देखा करेगा सदियों तक
छोड़ जाएँगे ये जहाँ तन्हा।

Tuesday, January 2, 2018

पायाखाली वाळू

पायाखाली वाळू 
जाता तुडवित 
ढासळले चित्त 
कणकण 

ओहोटीच्या पार 
लावता मी ध्यान 
अचानक ऊन 
मावळले 

अशी भडकावी 
काळजात आग 
तैसा रंग राग 
चोहीकडे 

अपुऱ्या डोळ्यात 
न मावे सोहळा 
पाहिजे फाटला 
उर आतां. 

: पायाखाली वाळू 
: शिरीष पै